Wednesday, February 25, 2015

zukte noda .i cunso ciska

coi ro do .i mi djuno lo du'u mi ciska nalzukte u'u .i ku'i ai ei mi se vajni lo nu ta'e ciska .i aisai jetfu troci .i ji'a mi se pluka lo du'u mi kakne lo nu sutra ciska o'a .i mi na nintadni .i pe'i mi jbocre .i ku'i mi nitcu lo nu cilre .i pe'i lo prenu poi sisti lo nu cilre cu ba binxo lo bebna .i ma'a nitcu lo nu ta'e cilre fi ro da .i aisaidai

ca lo nu cfari ciska lo karni kei mi pu pensi lo du'u tavla fi la lojban a lo cinri .i ku'i mi ca'o jimpe lo du'u lo nu ciska lo nu nalciska lo ka vajni cu zmadu .i ja'o mi ba ciska ca lo nu ji'a nalcinri vau uisai .i ui

ca lo cabdei kei mi jdice lo du'u lo nu tavla fi lo mi lifri .i mi pu jundi tu'a lo larcu runbau me'e la angus .i ri na cinri gi'e melbi .i ku'i mi se pluka lo du'u lo finti ku troci lo nu ctuca lo zukte'obi prenu te zu'e lo nunpluka .i ja'o mi ba troci lo nu finti lo runbau .i mi ba troci lo nu ctuca lo prenu .i pe'i lo sidbo be lo runbau tadni prenu cecmu cu simlu lo ka cinri .i la'a ji'a finti lo lisri ra'a lo runbau to pensi tu'a la tolkien toi .i ku'i mi ta'e na birti .i mi puzi troci lo nu ciska da .i mi gleki lo du'u mi puzi ciska da .i a'o ca lo balvi kei mi ba kakne lo nu tavla fi lo zasti cinri .i ku'i mi ca'o cinmo lo ka surla kei lo du'u mi ciska da

 u'u da'i la'a lo prosa ku nalcinri .i ku'i mi ca'o sisti lo nu denpa e lo nu nalciska .i mi ba ciska ca lo nu nalcinri .i mi puzi jdice lo du'u lo cunso nunciska lo nungunrivzu'e lo ka vajni cu zmadu vau u'osai .i uisai


Thursday, September 26, 2013

retsku da poi vajni vau zo'onaisai to prije nunpensi toi



la xikarunogos lisri lo nu ci'erkei la baduk .i ku'i za'a ji'a lisri so'i lo sidbo be lo du'u pensi tu'a lo sampu se lifri poi vajni .i mi jinvi ma lo se retsku .i pensi lo du'u lo lisri ku srana la baduk .i mi jinvi lo du'u lo santa la baduk srana .i lo te ci'erkei pu ze'u na se galfi .i ca lo cabna lo te ci'erkei ja'a ca na se galfi .i ji'a lo santa na se galfi .i pe'i lo tcepru dacti ku ka'e banzu .i la'a na prane .i ku'i ma'a kakne lo nu pilno lo sampu dacti lo zabna se lifri .i ma'a na nitcu lo pluja dacti lo li'i gleki .i ui

xu do vedli lo li'i tolcri la .ualis.


Wednesday, April 10, 2013

tavla fi pa lo cinri

mi se cinri tu'a so'o lo kibro karni be da poi srana lo dukse nunpensi a lo sidbo nunkucli .i la'a mi ba tavla fi lo selnei karni ca lo drata .i ta'onai ca lo nu mi pu pilno la tuitr kei mi ta'e fanva tavla fi lo se sitna jufra .i ta'o la'e di'u se mukti tu'a lo lojbo nuntolcre e lo sidbo nunselcinri to ji'a se mukti lo nu djica lo nu binxo lo jbocre toi .i mi pu kakne lo jufra nunciska enai lo prosa nunciska .i ca lo nuncinmo be lo ka lojbo bredi kei mi cfari djica lo nu finti lo prosa .i ta'onai so'o lo se sitna pu cinri mi mu'i tu'a lo se kucli sidbo .i mupli fa lu lu lo nu gleki lo nu jimpe cu traji vrude pluka li'u la leonardos davincis li'u joi lu lu ca dunda lo firgai lo prenu .i ri ba cusku tu'a lo jetnu li'u la oskar uaild li'u joi lu lu mi na banli stati i ku'i mi mutce kucli li'u la albert ainstain li'u .i mi ba troci lo simsa nunzukte .i ca lo nu facki zo'e lo se kucli kei ri ba karni terta'a .i ui

Tuesday, April 9, 2013

nalstodi .i ua .i o'u .i ui

mi djuno lo du'u mi ta'e nalciska .i ku'i mi pu cinmo lo ka mi bilga lo nu cinri ciska .i mi na birti lo du'u ma kau cinri .i ma cinri so'e lo jbopre .i za'a lo samske a lo banske cu simlu lo ka cinri lo jbopre .i ku'i lo nu tavla fi lo samske a lo banske na frili sepi'o lo lojbo .i ji'a so'o lo vajni valsi poi srana lo samske a lo banske na zasti .i ji'asai mi na mutce mutce mutce se cinri lo nu tavla fi lo samske a lo banske .i mi se cinri tu'a lo pijyske a lo citri .i ji'a ta'e mi se cinri lo nu cunso tavla .i o'u o'u .i mi jdice lo du'u mi nitcu lo nu binxo lo virnu ciska kei lo nu stodi ciska .i lo ciska noi se cinri tu'a lo pluka nunciska enai lo misno nunciska .i bredi lo nu stodi ciska .i u'osai .i uisai